بدا مؤتمر ابل الساعه 8 بتوقيت الكويت
وخلص بحدود الساعه 9 ونص
المؤتمر اول شي تكلم عن الايبود وشوية تطويرات له
راح اذكرها بنهاية الموضوع
واعلن عن الايفون الجديد اسمه iPhone 4 S
وهو نفس شكل الايفون الحالي بالضبط !
بس بمواصفات عالية
انا توقعت هالشي وكنت خايف لا يسوونها ابل !
انهم يتبعون سياسة ينزلون جهاز .. وتطويره السنه الي وراها ..
والسنه الثالثه جهاز جديد وعلى هالحاله .. يعني شكل جديد كل سنتين !
مثل ماكان 3G بعدين 3GS وبعدين 4 والحين 4S
المهم .. بغض النظر انهم ما غيروا شكل الجهاز
بس على الاقل عطونا مواصفات قويه
او بالاصح .. شي نقزر عليه لمدة سنه !!
التحديث كان على البرمجه ومواصفات الجهاز
انا تكلمت من قبل عن تجربتي للنظام الجديد iOS 5
وذكرت اغلب او اهم المميزات الجديدة
من المميزات الجديدة
هو المعالج الجديد :
هو نفس المعالج المستخدم في الايباد
وراح يكون الفرق على الايفون بشكل واضح
راح يكون الايفون الجديد اسرع بـ 7 اضعاف من الحالي
والرسوم راح تكون عاليه حيل نقدر نقول انها تقريبا playstation !
.
.
خدمة جديدة من ابل
Siri
سيري خدمة رد آلي بالايفون
اسأله اي سؤال ويجاوب عليه
مثلاً تقوله وين اقرب مطعم ايطالي
يقولك اكو 3 مطاعم وهذي اماكنهم
او تقوله .. قعدني الساعه 6 الصبح
يحطلك منبه
تساله شلون الجو هالاسبوع
يعطيك حالة الطقس
يوصلك مسج .. يقراه لك
تقوله : رد عليه .. وتقوله الرساله ويكتبها ويدزها
<< جنك خبل .. تسولف مع ايفونك ههههه
الصراحه خدمه قوية
كأنه سكرتير بمخباتك 😛
بس للاسف بالبدايه راح تكون متوفرة بـ 3 لغات
انجليزي – الماني – فرنسي
.
.
الكاميرة
الصراحه هذي من احلى المميزات اللي فيه
راح تكون 8 ميغابيكسل
قبل لا ادش بالتفاصيل بوضح نقطه مهمه :
لا تقارنون كاميرة الايفون باي جهاز ثاني
ترى نوكيا نزلوا تليفون في كاميرة 12 ميغابيكسل قبل 3 سنين
قوة الرقم مو معناته الصورة بتطلع حلوه
يعني تهقون الـ 12 ميغابيكسل مالت نوكيا افضل من الايفون ؟
اكيد الجواب لا ..
” مو بس يكبرون حجم الصورة على اساس انها 8 او 12 ميغابيكسل “
الصورة ما تعتمد بس على الميغابيكسل
تعتمد على قوة الجهاز ومعالجته للصورة وانه يطلعها بدقه عالية مع حجم كبير
اول شي :
كاميرة iPhone 4 S .. تم إعادة تصميمها
كان داخلها 4 عدسات والحين صار 5 عدسات
مع اضافة معالج يساعد في انه يعطي الصورة الوانها الطبيعية بشكل حلو
وتزيد من حدة الصور
الكاميرة الجديدة تصور بدقة 1080p
يعني Full HD
مو بس جذي .. ضافوا فيها ميزة مانع الاهتزاز
وفتحة العدسة صارة 2.4
بصراحه .. اللي ما يعرف يصور .. راح يبدع بالتصوير مع الايفون الجديد
ويصور صور احترافية ينافس فيها صور قوية !
مع النظام الجديد راح تقدر تعدل على الصور
انك تقصها او تعدل ميلانها وتوضح الوانها
الحلو بالايفون واللي يميزه عن اي تليفون ثاني
هو توافق النظام مع الجهاز
<< هالكلمه ما يحبونها اهل الاندرويد ههههههه
بالايفون المعالج الجديد قوي حيل .. مع كاميرة قوية
النتيجه هي انك تقدر تصور أكثر من صورة ورى بعض بسرعة
هذي صورة من تصوير iPhone 4 S
بدون تعديل باي برنامج ثاني
” اضغط على الصور لمشاهدتها بحجمها الطبيعي “
.
.
مشكلة السريفس
iPhone 4 فيه عيب في التصميم
اللي هي مشكلة بالسيرفس
حلوا المشكلة بالتحديثات .. بس ما انحلت بشكل كامل
لانه خطأ في التصميم
والكلام ما ينكره الا الشركات الحرامية اللي ما يدرون وين الله قاطهم
المهم الايفون الجديد بدال الاريل .. حطوا فيه اثنين 😛
وسرعة النت راح تتعدل عليه
وهذي مقارنة بين iPhone 4 و iPhone 4 S
.
.
من الاضافات الجديدة لـ iPhone 4 S
برنامج ابحث عن اصدقائك
تقدر تعرف ربعك وين موجودين عن طريق اضافتهم للبرنامج
طبعاً البرنامج راح يكون اسمه عندنا :
ابحثي عن زوجج 😛
<< ديروا بالكم يا شباب مو كل واحد يضيف زوجته بالبرنامج .. راح تبتلشون ههههههه
يعطيك مكانك .. ومسافة اللي ضايفهم عندك + موقعهم على الخريطة
البرنامج شي طبيعي مو شغال 24 ساعه الا بموافقة صاحب الايفون
” لانه راح يصرف شحن “
وعلى طاري الشحن
الايفون بطاريته راح تكون افضل
.
.
الاسعار بامريكا بولاية كاليفورنيا
” بعطيكم التوتل مع التاكس فيها لانه يفرق من ولايه لي ولايه “
16 غيغا = 700$
32 غيغا = 800$
64 غيغا = 900$
.
.
اخليكم مع هذا الفيديو اللي يشرح لكم باختصار اهم مميزات الايفون الجديد
.
.
نترك موضوع الايفون شوي
ونشوف شنو الجديد بالايبود
تحديثات بسيطه للايبود تاتش
راح ينزل لون ابيض
وراح يكون فيه مميزات iOS 5
والميزه الحلوه انه راح يدعم الـ iMessage
اللي هو مسجات بين الاجهزة المستخدمه لنظام iOS 5
اللي هي .. ايفون – ايباد – ايبود
عن طريق الايميل او رقم تليفون
.
.
والايبود نانو حصل على شوية تحديثات للبطارية
والنظام
واحلى شي تحديث اشكال الساعه
لان اكو ناس واجد يستعملونه كـ ساعه
بمجرد يركبون له سير .. الحين راح يستمتعون فيه اكثر
وراح يتحمسون الناس انهم يستعملونه كـ ساعه !
وهذي الاشكال الجديده للساعه
ماشاءالله دائماً متميز يالجلاوي وموضوع متكامل ومفصل الله يعطيك العافيه
شي جميل
الله يعافيك
ويسعدني ان الموضوع عجبك ^_^
أفضل موضوع كتب عن المؤتمر
شكرًا يا الجلاوي 🙂
الله يسلمك .. من ذوقك ^_^
ما شاء الله موضوع مبدع ومتميز
عرفتنا علي معلومات واجد
يعطيك العافيه
الله يعافيج .. ^_^